KALIBO, Aklan—Mas pang ginpabaskog it Aklan Police Provincial Office ukon APPO ro pagpatuman it gun ban it COMELEC samtang nagahilapit ro Barangay ag Sangguniang Kabataan ukon SK Elections 2023.
Suno kay PSSgt. Jane Vega, tagapaghambae it APPO nga haeos adlaw adlaw hay may mga PNP/Comelec checkpoints nga ginaplastar sa eain-eain nga banwa kun sa siin hugut nga ginatutukan ro Comelec gun ban dugang pa ro regular nanda nga checkpoint.
Base sa report it Provincial Election Monitoring and Action Team, sa banwa it Balete hay may bag-ong nadakpan it pag-eabag sa gun ban matapos nga sangka eaeaki ro nadakpan nga nagahupot it kutsilyo.
Ginpasiguro man ni PSSgt. Vega nga alerto ro kapulisan sa bilog nga Aklan para masayuran ro mga naga-eabag ag uwa nagapati sa ginapatuman nga laye.
Ro mga banwa it Balete ag Batan ro nakalista it mga violators apang nagaeaum ro APPO nga indi eon raya madugangan sa iba pang banwa.
Paathag man nana nga ubrahon nanda ro tanan nga andang masarangan agud nga mapabilin ro katawhayan sa Aklan sa maabot nga BSKE 2023.