Sa oras nga mapadayon ro importasyon it asukar, maapektuhan it husto kara ro local sugar producers eabi eon ro mangunguma it tubo.
Suno kay Bryan Bosque, deputy spokesperson it Bayan-Panay nga bukon eamang it mga sugar producers sa nasyon ro maapektuhan kundi maexpose man kara ro kakueangan it gobyerno sa pagsuporta sa sektor it agrikultura.
Ro maeagkong negosyante suno kana ro nagatueod sa importasyon bangud nga dikara sanda makaginansya it husto bangud sa baratong mayad ro asukar sa ibang nasyon.
Inde man suno kana mahambae nga may shortage sa supply it asukar sa nasyon bangud sa mga nadiskubrehan nga linibo ka sako it asukar sa nagkaeain-eain nga warehouse kon siin posibleng hungod nga gintago para sa maka-import it nasambit nga produkto.
Samtang sa pihak nga parte, intervention it gobyerno ro kinahang-ean sa makaron kasunod it napabalita nga posibleng makaangkon it shortage sa supply it asin.
Suno kay Bosque, kinahang-ean nga maghueag eon ro gobyerno ag raya ro masami nanda nga ginasinggitan kon ham-an it nagarally sanda bangud nga kinahang-ean nga pamatud-an it gobyerno ro kapasidad nga masolusyunan ro problema nga bukon eamang it para sa mga ganid nga negosyante kundi para man sa kubos nga mga pumueoyo.
