Ginklaru it Kalibo sangguniang bayan nga anuman nga adlaw makaron nga buean it Mayo hay maga umpisa eon man sanda sa uman nga pagpatuman it road clearing sa mga nagapangunang daeanon sa bilog nga banwa it Kalibo.
Raya ro ginpahayag ni SB member Ronald Marte, committee on peace and order and public utilities.
Sakop sigon kara ro parehong municipal ag barangay roads.
Nauna kara, nagpatawag it pueong DILG Kalibo nga nagamandu nga uman nga ipatuman ro road clearing operations matapos nga mataeupangdan nga naga inabu eon man ro mga naga-obstruct sa mga daeanon.
Eakip kara ro mga nagapatigayon it illegal parking ag mga establisimento nga nagabutang it andang mga baligya sa gina-agyan it mga tawo ukon sidewalk.
Ro operasyon hay pagapangunahan ni Kalibo Mayor Juris Sucro ag natungdan nga departamento it munisipyo ag ahensiya it gobyerno.
Samtang, ro mga madakpan nga may pag eabag sa unang kahigayunan hay paga sitahon anay.
Iga-demolish ro mga gamit nga nagatuga it obstruction it mga establisimento komersiyal ag pagahakuton raya it mga truck it LGU ag pwede raya nga eukton sa munisipyo.
Sa second offense, may multa eon nga paga atubangon depende sa LGU Kalibo ro pagdetermina ag ro 3rd offense hay ro kanselasyon it permit ag maboe-an it kahigayunan nga uman nga maka negosyo sa banwa.
Nasayuran nga napundo eamang ro pagpanghawan sa mga daeanon bangud sa pandemya.
