KALIBO, Aklan—Kasunod it padayun nga pagtaas it spike it kaso it coronavirus disease 2019 ukon Covid-19 sa banwa it Kalibo, pagalimitahan anay ro pagpa-uli sa mga locally stranded individuals ukon LSIs, returning overseas Filipino ag authorized persons outside residence ukon APOR.
Suno kay Punong barangay Neil Candelario it Brgy. Poblacion, Kalibo nga nagpaguwa it bag-ong advisory si Kalibo mayor Emerson Lachica nga instriktuhan anay ro pagpaguwa it acceptance certificate para sa mga gustong mag-uli nga kalibonhon.
Haeos punuan eon sigon ro mga quarantine facilities eabi eon ro mga nag positibo sa sakit nga naghalin sa Purok 1 C. Laserna St. Kalibo rason nga imposible eon nga maka-accommodate it mga naga-uli nga LSIs, APOR ag ROF.
Mag-eowas eamang kon haum sanda nga maggatos para sa andang kaugalingon nga accommodation sa mga aprubadong hotels, inns, guest house, apartments, condotel ag iba pa it local inter-agency task force.
Ginataw-an man sigon it konsiderasyon ro mga naga-uli nga importante ro rason.
Gindugang pa kara nga owa man it ginbag-o sa mga requirements kapareho it travel authority, medical clearance ag accomodatiom.
Ginaeauman eon sigon nanda ro pagbuhos it mga gustong mag-uli bangud sa holiday season.
