KALIBO, Aklan—Mabahoe ro importansya it pagpili sa ginabake ag ginapreparar nga pagkaon.
Raya hay agud nga makalikaw sa nagkaeain eain nga sakit kapareho it food poisoning ag perming paghingko.
May kaangtanan kara, uman nga nagpadumdom ro Provincial Health Office ukon PHO-Aklan sa publiko angot sa mga dapat nga himuon para sa euwas ag tama nga pagpreparar it mga pagkaon.
Suno kay Engr. Lucio Sta. Maria, it PHO-Aklan nga dapat nga magbakae eamang it pagkaon sa mga kilaeang tindahan.
Owa man suno pa kana it kasiguraduhan nga limpyo ro mga karne, hamon, ag hotdog nga himo eamang sa mga tindahan sa atun nga palibot.
Bangud kara, ro tanan hay dapat nga maging mabusisi sa pagpamakae.
Butangan it marka ro botelya nga ginabutangan it mga panakot sa pagkaon kapareho it asin, asukar, ag mantika.
Butangan man it marka ro mga gamit sa baeay kapareho it sabon, pangkulay, pamatay it insekto ag gasolina.
Indi pag-ibahon ro mga nasambitang botelya bangud sa posibilidad nga mahaluan it hilo ro pagkaon.
Likawan ro pagbakae it mga expired nga mga produkto.
Owa man it kamatuoran nga may allowance pa nga pilang buean ro expiry date it produkto.
Basahon it mayad ro mga nakabutang sa de-lata.
Dapat hay may label (Ingles ukon Tagalog) ag klaro ro mga nakabutang sa tatak kara.
Basahon kung anong klase raya it produkto ag kung siin ginhimo para masiguro nga euwas raya.
Indi eun pagbak-eon ro mga de-latang nayupi ukon naglobo bangud posibleng nasudlan eun raya it mikrobyo.
Dugang pa kara nga dapat maging malimpyo man sa kusina.
Perming limpyuhan ro mga gamit nga ginagamit sa pag-eaha.
Maghugas it alima bago ag matapos ro pagkaon ag maging malimpyuhon sa tanan nga oras agud malikawan ro food poisoning ag bukon it normal nga paghingko.
