KALIBO, Aklan—Ginakabig nga welcome development it Alliance of Concerned Teachers Partylist ro pagpirma sa Republic Act No. 11984 ukon ro “No Permit, No Exam Prohibition Act”.
Suno kay ACT partylist spokesperson Vladimir Quetua, may sabat eon ro mabuhay nga panawagan it mga estudyante kapin eon ag kan-o pa raya nga ginaduso it Kabataan partylist sa house of representatives.
Bangud kara, may mga institusyon nga posibleng maagrabyado rason nga ginasuhestyon sa gobyerno nga makaangkon it tikang agud nga maayudahan ro mga eskwelahan kapin eon ro mga eskwelahan nga sa bayad it estudyante nagasalig it sweldo it andang mga manugturo.
Ginpahayag dugang ni Quetua nga sa oras nga mapublish ro nasambit nga laye hay kinahang-ean raya nga sundon it mga natungdan nga eskwelahan.
Nauna eon nga ginpirmahan bilang laye ni Pangueong Ferdinand Marcos Jr. ro Republic Act No. 11984 ukon “No Permit, No Exam Prohibition Act” sa tanan nga mga pampubliko ag pribadong eskwelahan sa nasyon halin elementarya, hasta technical-vocational institutions.
Sa idaeom it laye hay ginamanduan ro tanan nga mga eskwelagan sa nasyon nga pasugtan ro mga estudyante nga nalisdan nga makabayad it matrikula nga makabuoe gihapon it andang periodic ag final examinations nga inde eon kinahang-ean pa it permit.
