Agud nga mapabilin nga bastante ro supply it karneng baboy sa bilog nga probinsya it Aklan, kinahang-ean nga ma-regulate ro pagpaguwa it natungdan nga klase it karne paadto sa mga kaeapit nga probinsya.
Suno kay Dr. Joseph Lachica it Office of the Provincial Veterinarian nga sa makaron hay ginapasugtan pa ro pagpaguwa it live weight nga baboy sandig sa ginpaguwa nga executive order ni Aklan governor Joen Miraflores apang posible sigon raya nga magbag-o agud nga maging supisyente ro supply kara sa probinsya kamana man para malikawan ro pagtaas sa presyo kara.
Kinahang-ean nga mapabilin ro bastanteng supply it karneng baboy ukon maging ro processed pork products para sa nagahilapit nga selebrasyon it Paskwa, Bag-ong Dag-on hasta it Ati-Atihan Festival.
Ginpaathag dugang nga kon maregulate ro pagpaguwa it karneng baboy halin sa probinsya it Aklan hay masiguro kara nga supisyente ro supply para sa mga konsumidor bangud nga ginadumilian ro pagsueod it karneng baboy maghalin sa mga kaeapit nga probinsya partikular sa Iloilo nga nakalista it kaso it African Swine Fever ukon ASF.
Sa makaron suno kay Dr. Lachica hay nagapabilin nga ASF free ro bilog nga probinsya it Aklan.
Nagapadayon man ro andang quarantine border checkpoint agud nga masiguro nga uwa it karneng baboy nga magasueod sa Aklan maghalin sa lugar nga ginakabig nga red zone.
