KALIBO, Aklan — Bangud sa ginpaguwa nga direktiba ni Philippine National Police ukon PNP chief General Oscar Albayalde sa tanan nga mga police regional offices nga ipasarado ro mga outlet it Philippine Charity Sweepstakes Office ukon PCSO sa bilog nga nasyon, ginpangunahan ni Aklan Police Provincial Director P/Col. Esmeraldo Osia, Jr. ro pagsarado sa Yetbo Gaming Philippines Corp. nga naga-operate it Small Town Lottery (STL) sa probinsiya.
Suno kay P/Corporal Jane Vega, tagapaghambae it APPO, raya hay bilang pagtuman sa mandu ni Pangueong Rodrigo Duterte nga punduhon eon ro operasyon it Lotto, Small Town Lottery (STL), Keno, Peryahang Bayan ag tanan nga gaming schemes nga may permit halin sa PCSO.
Ginpahayag pa ni Vega nga nagpatigayon it inspection ro mga otoridad ag iba pang augmentation force agud nga ipatuman ro direktiba it Pangueo partikular sa mga PCSO outlets ag iba pang betting areas sa pag-aresto sa sin-o man nga maga-eabag sa mandu.
Owa man it nakikita nga problema kara ro PNP bangud nga nagasunod eamang sanda sa mandu.
Madumduman nga ginmandu it pangueo ro pagpasarado bangud sa pagpati nga may mga iregularidad sa PCSO gaming operations kaibahan eon ro owa pagbayad it tamang buwis.
Angot kara, nagpanawagan ro APPO sa publiko nga suportahan ro mandu it pangueo.
