Ginpaathag it retired Police Master Sergeant ag dating myembro it Women and Children Protection Desk ro importansya it pagdumdom sa adlaw it mga ina ukon Mother’s Day.
Suno kay Babylyn Daylusan, raya hay para taw-an it pasidungog o mga ina para sa andang sakripisyo sa sangka pamilya. Ro pagiging ina sigon hay priceless apang masyadong demanding nga klase it trabaho pag-abot sap ag-asikaso it pamilya.
Dugang pa nana, sayod man it tanan nga ro mga ina hay kayang ubrahon ro tanan para eang sa kamaeayran it mga inunga, kaya raya sigon hay sangka pamaagi man para mag-tao it pagpasaeanat kanda.
Bilang sangka ina, manami suno kana sa pamatyag nga nadudumduman ro mga gina sakripisyo it mga ina, pati eon man ro pag-alaga nga ginatao sa bilog nga pamilya.
Paathag nana, umpisa kat aktibo pa imaw sa serbisyo, nagapatigayon eon imaw it mga information dissimenation ukon mga lectures eabi eon sa mga espesyal nga laye nga naga-protekta sa mga kababayin’an pati sa mga inunga.
Hasta sigon makaron nga maskin reterado eon imaw sa serbisyo, padayon karang paeapta-on rom ga kasayuran nga maka-benepisyo ro mga ina ag mga inunga.
Sa makaron, may mga ginaplano eon imaw nga aktibidad para sa padayon nga pagpanerbisyo sa kaparehong ina.
