KALIBO, Aklan–Makabig nga owa it kinaibahan ro selebrasyon it adlaw it tagipusuon sa Sweden kumpara sa Pilipinas.
Suno kay Bombo International Correspondent Geraldine Lindberg it Sweden nga haeos magkapareho eamang sa Pilipinas ro mga ginapatigayon nga programa ag nakaangdan nga hilimuon angot sa nasambit nga okasyon.
Patok man sigon idto para sa mga magkarelasyyon ro pagbaeayluhan it nagakaeain-eain nga regalo ag mga matam-is nga pagkaon.
Mabakae man sigon sa mga mall ro mga bueak partikular ro red roses, tsokolate ag mga stuff toys.
Apang bukon eamang sigon it para sa mga magcouple ro nasambit nga okasyon bangud nagapatigayon man ro mga estudyante para sa andang mga maestro ag maestra it mga programa angot sa pagselebrar it adlaw it tagipuson.
Kapareho sa Pilipinas, nagatao man it mga regalo, tsokalate ag mga heart shape letters ro mga estudyante para ipakita ro andang pag-apresiyar sa andang mga manugturo.
Sa pihak nga parte, mag-eowas sa pagbakae it mga bueak ag pagkaon,nagabakae man ro mga Swedish it mga souveners bilang memorabliya angot sa selebrasyon it adlaw it tagipusuon.
Samtang, indi man maduea ro nakaangdan it iba nga pagguwa para magkaon sa mga fine dining restaurants ag magdate kaibahan ro andang mga partner.
Apang bangud sa grabe nga kaeamig it panyempo sa nasambit nga nasyon, ro iba ginapila eon lang nga magtinir sa andang mga panimaeay para iselebrar ro nasambit nga okasyon.
