Kalibo Aklan —- Nagapadayon ro ginahimo nga boarder checkpoint sa kada baryo it banwa it Kalibo agud nga malimitahan ro pagsueod ag pagguwa it mga pumueoyo.
Raya hay matapos nga ginpaidaeom sa Enhanced Community Quarantine ro Kalibo ag ro bilog nga probinsya it Aklan tuga it 2019 coronavirus disease ukon COVID-19 pandemic.
May kaangtanan kara, ginpahayag ni Punong Barangay ag Ex-Officio Sangguniang Bayan member Ronald Marte nga ginastriktuhan ro kada residente partikular kon magsueod ro mga raya sa mga kaeapit nga baryo.
Ginpaathag nga inde makaguwa it baryo ro sangka indibidwal kon uwa raya it ginapakita nga quarantine pass ag kon bukon manlang it importante ro anang panaw kaparehas sa pagbakae it pagkaon ukon bueong.
Katuyuan sigon kara nga malimitahan ro hueag it kada isaea ag bilang pagsunod eon man sa Executive Order nga ginpaguwa ni Kalibo Mayor Emerson Lachica ag Aklan Governor Florencio Miraflores.
Samtang, kon ro sangka indibidwal hay may importante nga panaw sa ibang Munisipalidad hay kinahang-ean it mga raya nga magbueo it certification halin sa Barangay nga indicated ro rason it anang kinahang-ean sa nasambitang lugar agud nga makaeapos sa border checkpoint.
Samtang, ginhinyo man ni Marte ro kooperasyon it tanan agud nga maeampasan ro krisis nga ginapangatubang it bilog nga kalibutan.
