KALIBO, Aklan—Ginakabig it mga residente it Daegu City, South Korea nga naging “boring” ro selebrasyon ko pagsug-aeaw it bag-ong dag-on.
Raya hay matapos nga uwa it ginpatigayon nga maskin anong aktibidad kon ikumpara ko nagtaliwan nga dag-on.
Suno kay Bombo International Correspondent Yumi Kim, tubong banwa it Numancia apang presenteng naga-istar sa nasambit nga nasyon, uwa it maskin anong selebrasyon sandang ginpatigayon bangud nga ginbawaean raya it gobyerno.
Sa oras sigon nga may magreport nga may family gatherings nga nagakatabo hay pwede kang mamultahan ag ro nag report hay makabaton it reward.
Ro tikang sigon it gobyerno hay agud nga malikawan ro nagapadayon nga pagkalhit it deadly virus daea it coronavirus disease ukon covid-19.
Ginpahayag dugang nga ro South Korea hay una eon sa 3rd wave it Covid-19 rason nga mas ginstriktuhan sanda it husto it gobyerno.
Uwa man it mga fireworks display ag bawae man ro magpanumbaeay rason nga nagkanya-kanya eon lang ro tagsa ka pamilya.
Maskin ro mga Pinoy sigon sa nasambit nga lugar hay ginpaiway anay ro nakaangdan nga ginahimo sa kada pagsug-aeaw it bag-ong dag-on.
