Kalibo Aklan – Obligado eon nga magsuksok it face masks ro tanan nga mga pumueuyu kon nagaguwa it andang baeay .
Raya ro kaundan it ginpasa nga Executive Order No. 22 ni Aklan Governor Florencio Miraflores nga naga-mandu it mandatory nga paggamit it face masks.
Sa nasambit nga mandu, ginpahayag it Gobernador nga pwedeng maggamit it maskin nga DIY nga face masks, cloth face mask ukon anumang kapareho kara kon nagaguwa sa mga pampublikong lugar agud nga malikawan ro pag-eapta it coronavirus disease (COVID-19).
Kinahangean suno kana nga magsunod ro tanan sa nasambit nga mandu.
Samtang, bangud sa ginpaeawig nga Enhanced Community Quarantine hasta sa Abril 30, may direktiba makaron nga idugang it kada siyudad ag banwa ro andang sang buean nga Internal Revenue Allotment (IRA) para sa alokasyon sa ginapangatubang nga krisis sa COVID-19.
Gindugang pa it Gobernador nga nakataeana eon ro distribusyon it 6,000 pesos sa idaeum it Social Amelioration Program sa mga pigadong residente ag iba pang vulnerabli nga sektor.
May assistance man suno kana ro Department of Labor and Employment (DOLE) sa mga trabahador nga temporaryong naduea-an it trabaho ag ro Department of Agriculture sa mga apektadong mangunguma .
Samtang, ginatun-an eon sigon nanda ro bulig nga igatau sa mga drivers it pampublikong transportasyon nga naduea-an man it trabaho.
Sa pihak nga parte, ginkalipay man nana ro pag-angkon it buganang ani it paeay sa Aklan nga mabahoe nga kontribusyon sa food security.
