KALIBO, Aklan—Hugut nga ginsunod it 4,057 nga pampublikong eskwelahan sa bilog nga Western Visayas ro mandu it central office it Department of Education ukon DepEd nga pagkansela it face-to-face classes ko adlaw it Lunes, Abril 8 sa bilog nga nasyon.
Suno kay Mr. Hernani Escullar Jr., spokesman it DepEd Region 6, raya hay owa it kaangtanan sa heat index ukon naeksperyensiyahan nga grabeng init kundi nga agud mataw-an it nagakaigo nga paniempo ro mga estudyante nga makumpleto ro andang mga assignment, projects ag iba pa nga requirements.
Bukon man suno kana it required nga mag-report sa eskwelahan ro mga teaching ag non-teaching personnel.
Bukon man it sakop sa abiso ro mga private school apang pwede man raya nga ipatuman it andang mga school administration.
Engkaso suno kana nga owa it mandu halin sa natungdan nga local government units ukon school heads it suspension it “in person classes”, uman nga magabalik sa eskwelahan ro mga learners sa huwebes nga adlaw, Abril 11.
Sa pihak nga parte, as of 3:00 pm it April 5, kabilugan nga 1,051 nga mga pampublikong eskwelahan sa bilog nga Western Visayas ro nagapatigayon it alternative delivery mode of learning ukon modular distance learning.
Magapaguwa sigon sanda it update sa huwebes nga adlaw kon madugangan ro nasambit nga mga eskwelahan.
