KALIBO, Aklan–Ginakabaeak-an makaron it Provincial Health Office (PHO)-Aklan ro pagtaas it kaso it mga pamatan-on nga tinamaan it Hand, Foot and Mouth Disease (HFMD).
Raya hay makabig nga simple eamang nga baeatian apang makataeapon sa mga unga nga naga-edad it limang dag-on panaba.
Suno kay J-Lorenz Dionisio, Nurse III it PHO-Aklan nga pwede raya nga makatapon pinaagi sa direct contact sa tawong infected, posible man nga maipasa pinaagi sa eaway kapareho it pag-ubo ukon pagbahaon ag pagbuyot sa mga bagay nga gingamit it tawo nga may HFMD.
Importante sigon ro perming paghugas it alima agud nga makalikaw sa nasambit nga sakit.
Nasayuran nga halin Enero 1 hasta 29 hay nakalista eon ro Provincial Epidemiology and Surveillance Unit (PESU) it 121 nga kaso it HFMD.
Ro banwa nga naka-record sigon it pinakamataas nga kaso hay ro Malinao nga may 48, Numancia nga may 29, Kalibo hay 16 samtang ro Malay hay nakalista it siyam ag an-om sa Banga.
Samtang, ro pinakabata nga tinamaan kara hay sangka daywang buean nga eapsag.
