KALIBO, Aklan—Sambilog sa mga ginatutukan makaron it Aklan Police Provincial Office ukon APPO ro isyu it nagatinaas nga kaso it suicide incident sa probinsya it Aklan.
Sa ginpatigayon nga press conference makaron nga adlaw it Miyerkules, Nobyembre 18, uman nga gintalakay it mga otoridad ro haeos tatlong pilo nga gindugang sa mga kaso it nagapakamatay.
Madumduman nga ko nagtaliwan nga dag-on 2019 nakalista eamang it kapin sa 10 ka mga indibidwal nga nagpakamatay kung sa siin mas mataas sa datos nga nailista umpisa ko buean it Enero hasta sa presenteng buean it 2020 nga nag-abot sa 34.
Raya hay base datos nga natipon it APPO.
Sa nasambitan nga numero, ro banwa it Malay kaeakip ro Isla it Boracay ro nakalista it pinakamataas nga kaso it mga nagapakamatay nga nag-abot sa 8.
Ginsundan raya it banwa it New washington nga may 5.
Kalibo, Banga ag Tangalan nga may 3.
Numancia, Altavas, ag Ibajay nga may 2.
Samtang nakalista man tig sambilog nga kaso ro banwa it Buruanga, Balete, Batan, Makato, Libacao, ag Nabas.
