Nag-abot eon sa 6.1 percent ro inflation it nasyon sa buean it Hunyo.
Suno sa Philippine Statistics Authority (PSA), raya eon ro ika-ap-at nga buean nga padayun nga naga-arangkada ro pagtaas sa presyo it mga nagapangunang baeak-eon sa nasyon.
Nasayuran nga mas madasig raya sa 5.4% nga nailista ko Mayo 2022.
Suno pa sa PSA, mabahoe ro ginsaka it inflation makaron nga Hunyo kumpara sa 3.7% nga nailista ko Hunyo 2021.
Ro padayun nga pagtaas ag kadasig it inflation hay makabig nga mabug-at nga paeas-anon.
Kinahangean nga mapag-isipan it mayad kon paalin raya nga madunganan.
Anor o mga alternatibong pamaagi ro dapat nga obrahon nga indi mabutang sa aeang-aeang ro ibang bagay.
Samtang, ginpatigayon ro unang Cabinet meeting ni Pangueong Ferdinand ‘Bongbong’ Marcos, Jr. ko nagtaliwan nga adlaw.
Insigidang ginmandu ni Marcos sa anang economic team nga tutukan ro sitwasyon it ekonomiya it nasyon.
Suno sa pangueo nga nasayuran man it tanan nga may nabilog nga krisis sa supply it pagkaon rason nga dapat eagi raya nga masabat.
Mabahoe nga pagsubok ro paga-atubangon it Team Marcos bangud sa mataas nga utang it gobyerno ag epekto it COVID-19 pandemic.
Sa pihak kara, nagaeaum kita nga masarangan raya nga atubangon it bag-ong administrasyon.
Bilang pumueuyu, sambilog sa mayad nga kontribusyon hay ro kumpiyansa sa mga opisyal nga ginpili.
Ipangamuyo naton ro andang padayun nga kabaskog, kaaeam ag eabaw sa tanan ro katamparan .
