Grabe eon gid man ro presyo makaron it petrolyo.
Haeos tanan , raya ro ginareklamo
Ro mga pribadong motorista hay matsa nagasurender eon apang mas pa ro una sa pampublikong saeakyan.
Kon dati hay matsa matiis pa it transport group nga indi anay magpataas it sukot sa pamasahe ag ginbaton anay ro ayuda ukon ro fuel subsidy nga gintau it gobyerno.
Raya hay agud nga indi eon madugangan ro paeas-anon it mga pasahero eabi eon ag sa tunga pa ka kita kato it away sa pandemya.
Apang matsa indi eon sigon masarangan.
Sunud-sunod ag owa it pundo ro oil price hike.
Bukon eamang it basta-basta nga pagpataas, kundi nga bigtime ro ginapatuman.
May kahigayunan man nga naga-rollback apang sangkiri man ag matsa indi mabatyagan.
Batyag man makaron ro pagtaas sa presyo it mga baeak-on.
Makaron, gina-insister it mga driver it jeepney ag iba pang transport group nga aprubahan eon ro pagtaas sa pamasahe.
Owa eon sigon sanda it ginakita.
Sa tunga it padayun nga pagtaas it presyo it gasolina, nagapabilin man nga owa nagataas ro sukot sa pamasahe.
Kun indi sigon raya maaprubahan, posibleng magpundo sanda sa pagpamasada.
Ham-an sigon sanda magabiyahe kon ro andang ginakita hay maagto eamang sa pagpakarga ag owa eo it gina uli sa andang natungdan nga pamilya.
Nagahinyu man ro Palasyo nga indi anay pagpadayunon ro paeag nga untat-pasada samtang naga-isip pa ro gobyerno kon paalin sanda nga mabuligan mag-eowas sa pagpanupod it fuel subsidy.
Sa oras nga magpataas it pamasahe, ro mga commuters man ro maaapektuhan rason nga kinahangean gid it mayad nga pag estudyo.
Kon pagapasugtan ro pagpataas it pamasahe bilang bulig sa sektor it transportasyon, balansehon eon lang raya sa parte man it mga sumaeakay.
Ro pag-ilintindihan makaron ro kinahangean.
