KALIBO, Aklan — Gin klaro makaron ni Rowen Aguirre, Executive Assistant on Boracay affairs it LGU-Malay nga ku buean pa it Abril gin pauntat ro pagtabas sa bukid ag mga punongkahoy sa bahin it Barangay Yapak sa isla nga sangka protected forest area.
Sa interview it Bombo Radyo, gin pahayag ni Aguirre nga bangud sa kakueangan it mga permits rason nga nagpagowa ro lokal nga gobyerno it stoppage order sa pag-develop sa lugar.
Ro Costa de la Vista sigon nga gina panag iyahan it pamilya ni Senador Cynthia Villar ro developer para sa iga patukod nga integrated resort.
Si Senador Villar ro Chairman it Committee on Environment and Natural resources kun siin gin pangunahan kara ro Senate inquiry sa gin patuman nga Boracay closure.
Gin pahayag dugang pa ni Aguirre nga ro nagklahit nga video ag mga litrato sa social media hay owa it kaangtanan sa groundwork it resort kundi ro pag-divert it andang karsada maghalin sa orihinal nga plano.
Gina batikos sa makaron it mga residente ro pagsamad sa bukid sa lugar bangud maeapit raya sa mga gina estaran it fruit bats ukon mga kuyapnit nga gina kabig nga endangered species.
Sa pihak kara, gin pasiguro ni Aguirre nga uman nga iga patawag it LGU-Malay ro developer agud klaruhon ro insidente.
Nauna eon nga gin hayag sa Bombo Radyo ni Atty. Richard Fabila ng CENRO-Boracay nga gin mandua eon ni Environment Secretary Roy Cimatu ro pagpauntat sa tanan nga klase it construction sa Boracay.
