KALIBO, Aklan — Sangka pag-eabag sa ginapatuman nga provincial ordinance nga “one entry, one exit” policy ro gintaeanang tatlong dungkaan sa front beach it inter-agency task force para sa mga turista ag residenteng magasueod sa Boracay sa soft opening kara sa Oktubre 26.
Ro Cagban jetty port eamang ro naga-isaeahanong entry ag exit point sa isla.
Suno kay Aklan Congressman ag dating governor Carlito Marquez, ro bag-ong patakaran hay pag-eabag sa ordinansa nga sangka security measure agud ma-monitor ro mga nagasueod sa isla ag mapangalagaan ro beach front sa pagkasamad kara.
Nauna eon kara nga ginpahayag ni DENR Secretary Roy Cimatu sa ginpatigayong inter-agency meeting nga agud malikawan ro paggutok sa main road, sa beach front anay magaagi ro mga bisita.
Sa makaron hay doble-kayod ro mga tawuhan it Department of Public Works and Highways (DPWH) agud makahingabot ro ginpaeapad nga karsada sa reopening.
Bangud sa mga pag-uean, maeasa, lubak-lubak ag inde pa maagyan ro pilang bahin it karsada.
Sa pihak nga parte, maabong bawae ro magakibot sa mga bisita sa pagbukas it isla base sa guidelines nga nakataeana pang aprubahan it task force.
Mag-eowas nga bawae ro pag-inom, beach party ag manigarilyo sa beachfront, inde man pagpasugtan ro pagbutang it mga lamesa, pungkuan ag massage beds, kamana man ro mga souvenir stalls ag shops.
Kapin sa 2,036 nga kwarto ro haom eon ag nagapabiling 25 establisimento ro pasugtang maka-operate sa soft opening it isla.
Plano man it task force nga ipasarado ro isla sa sueod it sang buean kada dag-on agud maka-recover.
