Kasunod it nakataeana nga pagtama it El Niño Phenomenon sa nasyon hay ro pagpadumdom man it Office of the Provincial Agriculturist sa mga mangunguma nga sikyaron ro andang mga kaeanasan ukon pananom.
Ginpahayag ni Provincial Agriculturist Engr. Alexys Apolonio nga owa pa sa makaron it kasiguraduhan kung may nakataeana nga ayuda ro gobyerno para sa posibleng epekto it nasambit nga tuman kainit nga panyempo.
Rason nga ginapadumdom kara sa mga mangunguma nga antes itanom ro mga planong igatanom hay magpa-insure ukon magpa-assist sa mga natungdan nga opisina it andang mga tagsa ka Municipal Agriculture Office.
Puwedi suno kana nga magpa-insure rong mga agricultural-fisheries commodities sa Philippine Crop Insurance Corporation Ukon PCIC-Aklan.
Raya hay engkaso nga anuman ro matabo, mapakalamidad man ukon El Niño hay puwedi nga maigabalik ro andang mga naging investments ukon nagastos sa andang mga pananom.
Sa pihak nga parte, ginasuhesiyon man eabi eon gid sa mga mangunguma sa may irrigated ukon rained low lands nga temporaryo anay nga magtanom it mga pananom nga owa nagakinahangean it maabu nga tubi.
Kapareho it kamatis, talong, sitaw, pechay ag letuce nga mag-eowas sa owa nagakinahangean it maabu nga supply it tubi hay makatindog man sa tuman kainit nga panyempo.
