KALIBO, Aklan–Agud nga mas mataw-an it solusyon ro publiko angot sa problema sa climate change ag iba pang environmental issues, nagpatigayun it 2nd Aklan River, Batan Bay and Coast Summit and Training Workshop ro Aklan State University (ASU)-Kalibo kaibahan ro University of the Philippines.
Kaibahan sa gin-imbitahan sa nasambit nga workshop si Aklan Governor Joen Miraflores kung siin ginpasiguro kara ro anang bilog nga suporta sa mga ginapatigayun nga research sa Aklan river ag Batan bay agud nga maprotektahan ro natural resources ag mga pumueoyo it probinsya.
Suno sa gobernador, nagakadapat eamang nga mataw-an it igtueopangod ag mabahoe nga importansya ro palibot agud nga indi eubusan nga masamad ro eco system.
Ro anumang pagbag-o nga makahaealit suno kana hay may mabahoe nga epekto sa palibot.
Rason nga suportado kara ro proyekto angot sa awareness ag educational campaign kaeakip ro paghimo it long term project sa mga kasubuaan kabulig ro nagkaeain-eain nga ahensya it gobyerno.
Nasayuran nga eapnaag eon ro pagbaha sa haeos tanan nga kabanwanan kada naga-uean rason nga kinahang-ean eon nga maaksyunan ro problema sa palibot.
