KALIBO, Aklan–Ginproponer ni Kalibo Sangguniang Bayan member Matt Aaron Guzman sa ginpatigayun nga session kahapon ro sangka ordinansa angot sa pagtao it pribilihiyo ag benepisyo para sa mga Child Development Teacher nga nagaturo sa mga kabarangayan it Kalibo.
Partikular nga ginatumod kara ro pagtao sa mga natungdan nga manugturo it illness, death ag retirement benefit.
Suno kana, maabo nga mga Child Development Teacher ro nagpaabot it andang sentimiyento angot sa maisot nga honorarium nga andang ginabaton kada buean.
Haeos kueang pa sigon raya sa andang mga kinahang-eanon tunga it nagatinaas nga presyo it mga nagapangunang baeak-eon ag serbisyo.
Ginrekomenda man it pilang miyembro it konseho nga i-refer anay sa Committee on Finance, Committee on Rules and Human Resource ro natungdan nga ordinansa ni Guzman.
Madumduman nga nagpasa it sangka resolution si SB member Augusto Tolentino nga tuyo nga pataasan ro honorarium it mga DayCare Worker halin sa presenteng P1,650 ag ubrahon nga P2,500 nga gin-aprubahan man it tanan nga miyembro it konseho ko Marso 14, 2022.
