KALIBO, Aklan—Uwa eon it dapat pang kabaeak-an ro mga turista maging ro mga residente sa pagtuhaw it mga buroe sa binit it baybayon it isla it Boracay.
Suno kay Maylyn Orseni it Solid Waste Management it lokal nga gobyerno it Malay, kusa nga nagkaeaduea ro mga jelly fish bangud nga ginhunos raya it tubi pagkahunas pabalik sa tunga it dagat.
Gulpi eamang sigon nga nawash-out ro mga buroe nga nauna eon nga ginkabaeak-an nga base makahalit sa mga nagapaligos sa baybayon.
Ginklaro makaron ni Orseni nga eowas eon nga magpaligos sa baybay bangud nga ro nadagsa nga mga buroe hay bukon man it makahaealit sandig sa andang pagpangusisa.
Sa kamatuoran suno kana hay nawili pa ro ibang mga turista nga tan-awon ro mga buroe.
Uwa man sigon it namonitor ro mga miyembro it Municipal Disaster Risk Management Office ukon MDRRMO Malay ag beach guard nga may nakapitan ukon nahalitan it nasambit nga mga dikya.
Ro pagdagsa sigon it mga buroe hay daea it hanging habagat ag nagakatabo sigon raya pag-abot it makarundaya nga tyempo apang bukon it masyadong maabo kaparehas sa nagtuhaw ko nagtaliwan nga adlaw it Sabado.
