KALIBO, Aklan – – – Gin rekomendar ro pagtukod it Boracay Development Authority (BDA) nga maga bulig sa pagtutok sa pagdumaea it turismo sa isla it Boracay.
Raya ro gin suhestiyon ni Congressional Committee Chairman on Environment and Natural Resources Cong. Arnel Ty sa ginpatigayon nga inquiry sa nasambitan nga isla kahapon.
Nasayuran nga ro BDA ro maga bueos sa gin bilog nga Boracay Inter-Agency Task Force nga base sa Executive Order hay may hasta sa daywang dag-un eamang nga pag eksister.
Tinotuyo suno kay Ty it pagbilog it BDA hay agud nga maging sustainable ro resulta it rehabilitation efforts it inter-agency task force.
Paga bilugon sigon ro BDA it mga representante maghalin sa national ag local government, NGO’s, ag iba pang stakeholders apang, owa pa gin tumod ro mangin composition kara bangud sa pagatalakayon eon lang suno kana sa tiempo nga maidihon eon ro House Bill nga naga krear it BDA.
Nagpasalig man suno kay Ty si Aklan Cong. Carlito Marquez nga imaw mismo ro maga author sa BDA nga iga dihon kara sa uman nga pagbukas it session it Kamara sa maabot nga Hulyo 23.
Mabahoe man ro pagpati ni Ty nga ro pagtukod it Boracay Development Authority ro makabulig sa pagtao it solusyon sa mga problema nga naga eksister sa isla kaeakip eon ro tinotuyo nga indi eon matabo it uman ro kontrobersiya nga gina eakutan it isla partikular eon sa isyu it water pollution nga nagresulta agud ipasarado raya sa sueod it an-um nga buean.
