KALIBO, Aklan — Mas makapamayad nga iduso ro pagtukod it Independent People’s Commission agud mas pa nga mapabaskog ro Independent Commission for Infrastructure (ICI).
Raya ro panan-awan ni Atty. Jude Mangilog, president it Integrated Bar of the Philippines Aklan chapter.
Suno kana nga ro IPC hay may prosecutorial powers, eakip ro awtoridad nga magpaguwa it subpoena ag ibutang sa contempt ro mga indibidwal.
Sa makaron sigon hay nabuytan man it ICI ro andang trabaho bilang fact finding body kun sa siin may pilang kaso eon ro andang gin-refer sa korte nga natungdan ag sa Ombudsman, apang kinahangean nga mataw-an pa raya it ngipon .
Bukon it kapareho it ICI nga ginmanduan nga mag-imbestiga eamang it mga proyekto sa imprastruktura, ro bersyon kara it IPC hay maga-usisa sa anumang klase it iregularidad sa nasyon.
Raya hay kasunod it natukiban nga maeapnagon nga korapsyon sa bilog nga nasyon .
