Pagturok it ikaywang booster shot sa mga senior citizens, immunocompromised individuals ag frontline healthcare workers, aprubado eon it FDA

Gin-aprubahan eon it Food and Drug Administration (FDA) ro pangaywang booster shot kontra sa COVID-19.

Ginkumpirma raya it Department of Health (DOH) kung siin unang pagataw-an it bakuna ro mga senior citizens, immunocompromised individuals ag frontline healthcare workers.

Una eon nga ginpahayag it DOH nga kinahang-ean nga ap-at nga buean anay ro nagtaliwan halin kat naturukan it unang booster shot antes nga magbaton it ikaywang booster shot.

Para sa mga immunocompromised individuals, ginpahayag it DOH nga dapat sundon it mga raya ro laygay it andang doktor.

Sa makaron, nagahimo eon it guidelines ro National COVID-19 Vaccination Operations Center (NVOC) para sa roll-out it ikaywang booster shot.