Ginkundina it Psychological Association of the Philippines (PAP) ro pahayag ni Senador Robin Padilla nga “weak” ro mga pamatan-on makaron ag ginpahayag nga raya hay stigmatizing ag bukon it mayad para sa mga may gina-agihan nga mental health issues.
Suno sa PAP, saea sa siyensya ag peligroso sa sosyudad ro pag-angot it mental illness sa kahinaan it karakter.
Ginpahayag dugang nga ro depresyon ag iba pang mental health conditions hay bukon it senyales it katamaran o moral failure, kundi mga kondisyong may biological, psychological, ag social nga salik.
Ginpamilit pa it grupo nga ro pagtawag nga “weakness” sa mental illness hay nagatuga it huya ag nagapugong sa mga tawo nga magpangayo it bulig.
Base sa datos it UNICEF Philippines, ginaboeobanta nga sambilog sa waeong adolescents ag sambilog sa 17 nga unga sa nasyon hay may diagnosable mental disorder.
Samtang, suno man sa World Health Organization (WHO), kaibahan ro depresyon ag anxiety sa nagapangunang rason it disability sa Pilipinas.
Ginpahayag it PAP nga ro mas mataas nga numero it napabalita nga kaso hay owa nagakahueugan nga mahina ro pamatan-on kundi mas may kasayuran eon sanda sa mental health.
Nagpanawagan ro PAP sa mga lider nga maging responsable ag nakabase sa siyensya ro mga pahayag angot sa mental health.
Bukas man sigon ro grupo nga makipagbueuligan sa mga policymaker para sa mas maayos nga mental health programs ag stigma reduction.
Madumduman nga ko Pebrero 11, ginpahayag ni Padilla sa Senate hearing nga ro mga pamatan-on makaron hay mahina.
Ginpamilit pa kara nga dapat nga usisaon ro epekto it sobrang paggamit it social media sa pamatan-on.
