Ginpahayag ni U.S. President Donald Trump nga nagpasugot sigon ro Iran nga indi pagpadayunon ro pagbitay sa waeong babayeng raliyista, matapos nga gina-alegar nga ginhinyu ag bilang respeto man sigon kana nga Pangueo it Estados Unidos.
Suno kay Trump, ap-at sa mga kababayin-an hay pagapahilwayon eagi samtang ro ap-at nga iba pa hay makulong it sang buean.
Gintawag nana raya nga “very good news” ag gin-insister nga raya hay bangud sa anang hinyu rason nga owa nadayun ro planong pagbitay.
Sa pihak kara, hugut nga ginpamalibaran it mga awtoridad sa Iran ro pahayag ni Trump.
Suno sa Iranian judiciary news agency nga Mizan News Agency, owa it nakataeanang planong pagbitay sa nasambit nga mga kababayin-an ag ginpahayag nga himo-himo eamang raya it Amerika.
Ginpamilit pa it Iran, ginagamit eamang ni Trump ro isyu agud nga magpakitang-gilas ag pataeangon ro atensyon halin sa mga isyu it giyera ag tensyon sa rehiyon, kaibahan ro isyu sa Strait of Hormuz.
Suno sa Iran, ro pilang mga babaye nga gin-aresto hay nakahilway eon samtang ro iba man hay nagapangatubang sa kaso nga posibleng magresulta sa pagkakulong apang bukon it penalidad nga kamatayon.
Owa pa it opisyal nga pahayag halin sa White House ag Iranian Foreign Ministry angot sa nasambit nga isyu.
