Sangka higanteng cane toad ukon sangka klase it paka nga ginpangaeanan nga “Toadzilla” ro nakita sa Conway National Park sa Australia.
Ginatumod pa makaron kon masarangan raya nga kilaeahon it Guinness World Record bilang pinakamabahoe nga paka sa kalibutan.
Ginasugid nga may bug-at si Toadzilla nga 2.7kilos ukon 6 pounds, nga katumbas it bug-at it sangka maisot nga bag-ong unga nga eapsag.
Apang owa pa sigon it kumpirmasyon kun maagaw kara ro nailista sa Guinness World Record nga pinakamabahoe nga paka sa bilog nga kalibutan.
Base sa Guinness World Record, ro paka nga may buyot sa rekord bilang pinakamabahoe nga paka sa kalibutan hay may bug-at nga 2.65 kilos ukon 5.8 pounds.
Suno sa sangka ranger, nakita nanda si Toadzilla sa Conway National Park sa Australia.
Apang bangud nga ginakabig nga invasive species ukon dumueuong sa Australia ro cane toad nga pwedeng magtuga it peligro sa iba pang sapat sa nasambit nga parke, kinahangean nga boe-on it park rangers si Toadzilla sa lugar.
Ginasugid nga gindaea sa Australia ro mga cane toad ko 1935 para makontrol ro pagpameste it cane beetles ag iba pang insekto.
Apang madasig nga naglobo ro populasyon it cane toads bangud nga owa raya it natural predators idtu.
Apang bukon it kapareho it ibang cane toads nga nabobo-oe it rangers, owa ginpatay si Toadzilla kundi gindaea sa Queensland Museum para sa research.
Owa pa it kumpirmasyon sa Guinness kun nabasag ni Toadzilla ro record sa pinakamabahoe nga paka sa kalibutan.
