Kalibo Aklan———–Makataliwan ro limang adlaw pagkatapos nga magpanaeasa ro bagyong Odette sa Palawan, amat-amat eon nga nagbalik ro supply it tubi, kuryente ag maskin ro linya it komunikasyon .
Suno kay bombo correspondent Charlie Ligad it Puerto princesa City, Palawan nga mabahoe ro andang pagpasaeamat bangud nga uman nga nagabalik sa normal ro andang sitwasyun.
Raya suno kana ro kauna-unahan nga kahigayunan nga nakaexperiensiya sanda it sobra kabaskog nga bagyo kun sa siin maabu nga mga baeay ro naguba ag maabu nga linya it kuryente ag telekomunikasyon ro nasamad kasunod it mga natumba nga mga poste .
Mag-eowas kara , kaabuan sa mga tulay idtu hay nasamad ag nakaangkon pa it landslide .
Sangkiri eamang suno kana ro nahalitan sa mismong siyudad apang sa naaminhan nga parte it lugar hay grabe ro kahalitan .
Samtang, sigidas suno kana ro distribusyon makaron it relief goods sa mga biktima it bagyo.
Naging mabudlay suno kana ro paghatud it ayuda eabi eon sa pinakapunta nga barangay maeapit sa Roxas , Palawan nga grabe man nga nahalitan ni Odette bangud sa indi maagihan nga mga karsada rason nga sa dagat eon lang nag agi ro mga volunteers ag iba pang rescue team .
Nagpahayag man it kasubo ro mga residente bangud nga nakilaea eamang ro Palawan nga best island apang kat tumama ro bagyo hay medyu nakalipatan sanda .
Sa makaron hay padayon nga nagakinahangean ro mga taga Palawan it food packs, bueong, haboe , temporary shelters ag iba pa .
Nagpanawagan man raya it mga volunteers nga maga-repack it mga food packs sa taeatapan it andang provincial ag municipal disaster risk reduction and management council.
