KALIBO, Aklan —- Naboe-an it CCTV ro pagpangloko it daywang bakla nga miyembro it palit-pera modus sa sangka empleyado it ticketing office it sangka shipping company sa Brgy. Caticlan, Malay, Aklan.
Nagpakilaea sigon ro mga suspek nga sanday Mark ag Joseph Robles.
Nagbakae ro mga raya it ticket nga tourist accomodation paagto sa Batangas nga nagabalor it P2,400 pesos.
Nagbayad sigon ro mga suspek it P3,000 nga insigida man nga ginsinsilyuhan it teller it P600 pesos.
Kasunod kara, ginpataeang it daywa ro teller agud nga makasalisi ag makakulimbat it kwarta.
Gin balik it bading nga suspek ro ticket nga anang ginbakae ag pagabawi-on eon lang sigon ro kwartang ginbayad .
Pagdawat it P3,000 pesos, ginbutang raya it bading sa anang boesa , ag insigidang bumalik sa teller ag ginhambae nga P300 eang ro anang ginbalik.
Kat marealisar it teller nga daywang beses nana nga gintaw-an it P3,000 ro mga suspek hay insigida nana raya nga ginpa-eagas sa andang gwardiya apang madasig nga nakapaeagiw ro mga raya sakay it sangka motorsiklo.
Samtang, nagpaandam ro Malay Police Station sa mga kahera ag iba pang tag-ana it mga establisimento komersiyal eabi eon sa isla it Boracay nga maging alerto sa pagsinsilyo ag pagbaligya agud nga indi masalisihan ag “maisahan” it mga miyembro it palit-pera gang nga naga-gala makaron sa Aklan.
