KALIBO, Aklan — Dapat nga may magapanabat sa palpak nga bus stop project it Department of Transportation sa banwa it Kalibo.
Raya ro ginpahayag ni Sangguniang Bayan member Raymar Rebaldo, chairman it Committee on Infrastructure kasunod it pagkakas eon sa ginpatindog nga mga istraktura sa tunga it drainage system ag pathwalk partikular sa Brgy. Andagao ag Mabini St. Kalibo.
Suno kay SB member Rebaldo nga sa anang pagkasayod, sangka dokumento ro ginsumite it engineering department it munisipyo it Kalibo sa implementing agency nga Department of Public Works and Highways (DPWH) nga ginsundan it pag dismantle it contractor it proyekto sa mga istraktura nga andang gin-umpisahan.
Makabig sigon nga pag-uyang it pondo ro proyekto nga owa anay gin-estudyuhan antes nga ginpatuman.
Dugang pa nga ro pagpatindog it bus stop sa tunga it drainage hay bawae ag illegal kun sa siin owa raya it nagakaigo nga koordinasyon sa munisipyo.
Madumduman nga daywang beses nga ginpatawag it konseho ro contractor angot sa nasambit nga proyekto.
Samtang, ginpahayag pa ni Rebaldo nga blangko imaw kon ano ro masunod nga plano it natungdan nga ahensiya it gobyerno matapos nga ginkakas ro mga illegal structures.
