KALIBO, Aklan—Ginkoronahan bilang Miss Eco Philippines 2021 ag naangkon man ro Miss Photogenic special awards it pambato it Aklan nga si Miss Kathleen Paton sa kakatapos eamang nga coronation night it Miss World Philippines 2021 nga ginpatigayon sa Subic Bay Exhibition and Convention Center sa Olongapo, Zambales.
Si Miss Paton ro magiging pambato it Pilipinas sa Miss Eco International nga igapatigayon sa nasyon it Egypt March 2022.
Nauna eon nga nakasueod sa Top 10 Finalist para sa Top Model competition si Miss Paton sa ginpatigayon nga Gala Charity Night ko July 22, 2021 sa Grand Ballroom, Okada, Manila kon sa siin otomatiko imaw nga nakasueod sa semifinalist it Coronation Night.
Madumduman nga si Miss Paton ro ginkoronahan bilang Miss Teen International 2017 ag naangkon pa ro Miss Teen Charming special award sa ginpatigayon nga international beauty pageant sa Bangkok, Thailand ko Setyembre 23, 2017.
Mag-eowas kara, ginkoronahan man imaw bilang Miss Manila 2018 sa Philippine International Convention Center ko June 26, 2018.
Si Paton nga Manila city’s ambassadress hay naangkon man ro Best in Swimsuit sa nasambit nga beauty pagaent ag nag-uli it cash prize nga P1-million pesos.
Ro Filipina-Australian beauty hay onga nanday Roy Paton, sangka Australian national ag Luz Sinag Paton it Brgy. Laserna, Nabas, Aklan.
