KALIBO, Aklan—Nagtapos sa top 15 ro journey it Altavasnon beauty sa ginpatigayon nga coronation event it 2019 Miss Earth Philippines nga ginhiwat sa Okada Manila sa Paranaque City.
Si Miss Elmarie Dewara, 17-anyos ag tubong Brgy. Odiong, Altavas hay kaeakip sa 45 mga kandidata nga nakipag-agawan it korona sa prestihiyosong pagaent.
Madumduman sa anang interview sa Bombo Radyo, ro anang adbokasiya hay para maamligan ag maipreserba ro mga marine life ag dapat nga masayuran it kaabuan nga ro tanan nga kasubaan ag kaeawran hay may naga-exister nga marine life.
Engkaso gidman nga nagdaog hay ana sigon nga gamiton nga instrumento ro Miss Earth agod nga mas maging maeawig pa ro anang platform para sa anang adbokasiya kamana man nga maipabati ro limog it mga pamatan-on.
Nasayuran nga si Miss Dewara hay nag tapos it anang elementarya sa Echelon Development School sa Altavas samtang sa Regional Science High School for Region VI mat-a kara natapos ro anang sekondarya ag makaron hay sangka Senior High student sa University of St. La Salle.
Samtang sa pihak nga parte, nagdaog bilang Miss Earth Philippines 2019 si Janelle Tee it Pasig City.
Miss Philippines Air mat-a ro representante it Tagaloan, Misamis Oriental nga si Ana Monica Tan.
Miss Philippines Eco-Tourism si Miss Maasin, Iloilo Karen Nicole Piccio.
Miss Philippines Fire si Miss Marikina City Alexandra Dayrit ag Miss Philippines Water si Miss Tacloban City Chelsea Fernandez
