KALIBO, Aklan—Padayon nga nakikipagsukoe ro pamilya Ambay it Brgy. Nauring, Pandan, Antique agud nga maangkon ro nagakaigong hustisya para sa biktimang si Bonna Hercia Ambay, 24-anyos ag branch manager it sangka pawnshop sa banwa it Kalibo.
Raya hay matapos ro haeos sang dag-on eon ro nakataliwan kat matabo ro makangiedlis nga krimen kon sa siin pursigido ro pamilya nga masentensyahan it mintras nagakabuhi nga pagkakulong ro suspek nga si Mark Archie Torrefiel, sa legal nga edad it Brgy. Cajilo, Makato nga imaw man mismo ro gwardya it pawnshop.
Suno sa magueang it biktima nga si Bonife Ambay, inde sanda mag-ungkat hasta nga inde maita-o ro hustisya sa anang igmanghod kon sa siin ro kasong Robbery with Murder nga ginpasaka kontra sa suspek hay ginpasaka pa raya sa kasong Reclusion Perpetua.
Maskin sang dag-on eon suno kana ro nakataliwan hay adlaw-adlaw gihapon nanda nga ginabatyag ro sakit it hinaling pagkamatay it anang igmanghod.
Sa pihak kara, nag-apela imaw it pangamuyo sa publiko para sa kaeag it anang igmanghod kamana man uman nana nga ginpasaeamatan ro tanan nga tawo nga nagbulig kanda sa tyempo it andang kalisod.
Madumduman nga brutal nga ginpatay ro daeaga sa mismong sueod it pawnshop ag pagkaagahon pa nakit-an ro anang bangkay nga nagapaligos sa kaugalingon nga dugo matapos nga gin-aywanan it suspek.
Samtang, si Torrefiel hay presenteng nakakulong sa Bureau of Jail Management and Penology ukon BJMP sa Brgy. Nalook, Kalibo.
