KALIBO, Aklan—Eubos ro pagkanugon it pamilya Andaya matapos nga matakaw it mga manakaw ro pila sa andang mga rare nga tanum.
Suno kay Ms. Alyssa Marie Andaya, residente it Brgy. Tabayon, Banga nga raya ro kauna-unahan nga kahigayunan nga natakawan sanda it tanum.
Nagakahaeaga sigon it kapin sa P30,000 hasta P50,000 ro balor it naduea nga mga tanum sa andang hardin nga ginakaeakipan it Philodendron Campii Lynette, Philodendron Birkins, Philodendron red congo, Philodendron pink princess, Silver Fern, Card Board, Anthurium Radicans ag Queen of the Night.
Nag-apela man raya sa mga pumueoyo nga maging mapagmatyag ag makipag-angot kanda engkaso nga may matueopangdan nga magabaligya it nasambitang mga tanum.
Nagaeaum man sigon ro andang pamilya nga maibalik pa ro mga hardin bangud mabahoe sigon ro sentimental value kara sa andang lola nga tag-ana it Christine’s Garden.
Sa makaron hay blangko pa ro pamilya kung sin-o ro sa likod it pagpanakaw bangud owa man sigon it maeapit nga CCTV sa andang lugar.
