Ginkumpirma ni Mary Jane Cruz nga ro nakit-an nga nagakaagnas nga bangkay nga nasapwan it sangka construction worker sa Aklan river nga sakop it Brgy. Palale, Banga hay ana nga igmanghod nga si Rogelio Cruz, 60 anyos ag may sakit nga epilepsy.
Suno kana, adlaw it Biyernes, Pebrero 13 kat nataeopangdan nanda nga inde eon nanda makit-an ro eaeaki hasta it gabie rason nga nagpangayo imaw it bulig sa andang kapitan it Brgy. Polo nga mausoy ro anang igmanghod.
Angot kara, insigida nga nag-aksyon ro barangay council apang uwa gid nanda nakit-an ro eaeaki hasta sa nakabaton it tawag ro Banga Municipal Police Station nga may nakit-an nga bangkay sa suba.
Sa imbestigasyon it pulisya, posibleng natumba raya ag naeomos nga gintunaan it anang kamatayon.
Ginkumpirma man ni Mary Jane nga uwa it ginainom nga maintenance ro anang igmanghod para sa kuoe ag kumbinsido sanda nga inatake raya samtang una sa suba ag uwa it nakakita kana rason nga uwa eon imaw natabangan pa.
Si Rogelio hay insigidang igaeobong bangud nga una eon sa state of decomposition ro ana nga eawas.
