KALIBO, Aklan–Desido nga magpasaka it kaso ro pamilya Dela Cruz kontra sa suspek nga nagbuno sa biktimang si Sherwin Dela Cruz ko gabi-i it Sabado sa printi it sangka bar and restaurant sa Brgy. Tambak, New Washington.
Suno kay Floresto Dela Cruz, ama it bikitima nga hasta makaron hay owa gihapon mabuoe ro nakaungot nga siyaw sa ueo it anang unga.
Nakataeana sigon raya nga ipaidaeom sa operasyon matapos nga gindaea sa siyudad it Iloilo kahapon para sa nagakaigo nga pagbueong.
Ginasugid nga grabe ro gin-ubra it mga suspek bangud armado ro mga raya it nagkaeain-eain nga armas kapareho it bote, bato, talibong ag may nagpaeupok pa it baril.
Sa pihak kara, hugut man nga ginpamalibaran it sambilog sa ginaturo nga mga suspek nga si Joseph Masinda, 19-anyos it Brgy. Briones, Kalibo nga imaw ro nagbuno sa biktima.
May kaangtanan kara, nagapangayo makaron it bulig ro bilog nga pamilya Dela Cruz sa may mga mabinueawanon nga tagipusuon nga buligan sanda sa gaeastuson-medikal it biktima bangud nagakinahang-ean sanda it mabahoe nga kantidad para sa operasyon.
Ginpahayag ni Judy Ann Lumio nga mabuot nga klase it tawo ro anang igkampod ag owa raya it anumang record angot sa kinagamo.
Gusto sigon nanda nga mataw-an it hustisya ro natabo kay Sherwin.
