KALIBO, Aklan—Nagapati ro pamilya Fulgencio nga may mabahoe nga rason sa likod it madasig nga pagkapaeagyo ni Randy Fulgencio sa Aklan Rehabilitation Center ko Hunyo 6.
Suno sa anang nanay nga si Marelita Fulgencio, maskin nga paealigban para kanda kon paano nakapaeagyo si Randy hay nagapati gihapon sanda nga posibleng nakahimo raya it pamaagi bangud sa mga nauna eon nga paeag sa anang kabuhi.
Ginsaysay it ginang nga unang ginkulong sa Bureau of Jail Management and Penology ukon BJMP si Fulgencio apang aksidenteng nakainom it muriatic acid nga hinalo sa tubi rason nga ginsaylo sa ARC.
Apang, pag-abot sa ARC hay uman raya nga naospital matapos nga daplisan it polbora halin sa pinoepog nga bala.
Sa mga natabo sigon sa anang onga sa sueod it pasilidad hay mabahoe nga paealigban para kanda.
Apang, nagaeaum gihapon imaw nga buhi ro anang onga nga hasta sa makaron uwa gid nakapabatyag kana halin kat nakapaeagyo raya sa ARC.
Panawagan it ginang nga magsurender eon si Randy bangud nga uwa sanda nagapabaya sa anang kaso nga sa andang pagpati hay tinanom ro droga nga nadakpan kana sa tyempo it buy-bust operation.
Nasayuran nga si Randy hay padayon pang ginatugis it mga otoridad matapos nga nakapuga sa ARC sa Brgy. Nalook, Kalibo nga nagapangatubang sa kasong pag-eabag sa Republic Act 9165 ukon Comprehensive Dangerous Drugs Act of 2002 ag Robbery.
