KALIBO, Aklan—Dismayado ro pamilya Gonzales it Brgy. Fatima, New Washington matapos nga ginkakas sa listahan it mga makabaton it social pension halin sa Department of Social Welfare and Development (DSWD) ro anang 72-anyos nga ina.
Suno kay Mr. Arturo Gonzales nga umpisa nga ginpatigayon ro validation ko nagtaliwan nga dag-on hay owa eon naeakip sa social pension pay-roll ro anang ina.
Nagapangayo sigon sanda it explinasyon sa andang Municipal Social Welfare and Development Office ukon MSWDO ag sa presidente it asosasyon it mga senior citizens sa nasambit nga banwa, apang pareho ro sabat it mga raya nga owa sanda it mahimo bangud nga desisyon raya it central office.
Nangawa sigon sanda bangud nga owa man nagabaton it pension halin sa Social Security System ukon SSS ro anang ina.
Aminado man sanda nga may mga igmanghud imaw nga abroad, apang ro ginapadaea nanda nga kwarta hay husto eamang para sa anang pagkaon ag maintenance nga bueong.
Samtang, ginbulgar pa kara nga pila sa andang mga kasimaryo hay pensionaire apang nakakabaton gihapon it social pension.
Makabig sigon raya nga bukon it makatarungan kanda partikular sa andang ina.
