KALIBO, Aklan—Nagapangasubo ro pamilya ni Ace Gumban matapos raya nga barilon it makapilang beses it riding in tandem nga gintunaan it anang hinali nga kamatayon.
Suno kay Henry Concon, tiyo it biktima nga nagapanawagan sanda it hustisya bangud sa makangieidlis nga pagpatay sa anang gumankon.
Ginpahayag dugang nga matapos nga mabaril-patay man it riding in tandem ro anang ama ko nagtaliwan nga Setyembre 23 hay owa eon raya nag uli sa andang baeay sa Polocate, Banga.
Temporaryo sigon nga naga-istar ro biktima sa baeay it anang igmanghud sa Brgy. Lapnag.
Nag-negosyo raya it barbecuehan matapos nga naghalin sa anang trabaho bilang truck driver sa Metro Manila.
Ro biktima hay may asawa apang idtu nagatinir sa Altavas apang owa sanda it unga.
Nagdesisyon ro andang pamilya nga ro anang bangkay hay ihaya eon lang sa sangka funeral homes sa banwa it Kalibo.
