KALIBO, Aklan—Nagapati ro pamilya Gumban nga konektado ro pagbaril-patay kabi-i sa 37 anyos nga si Ace Gumban sa pagpatay man sa anang 76 anyos nga ama nga si Armando Gumban, alyas Bondying ko Setyembre 23 it makaron nga dag-on.
Suno sa 79 anyos nga si Guillermo Concon, lolo it biktima nga ro anang apo ro nagpursige nga mapasakaan it kasong murder sa Aklan prosecutors office kontra sa daywang suspek nga responsable sa pagpatay sa anang ama sa Polocate, Banga.
Sa kamatuoran suno kana hay nakataeana eon nga magpaguwa it warrant of arrest ro korte kontra sa mga suspek.
Madumduman nga ginbinaril hasta nga mapatay it riding in tandem si Ace kabi-i samtang nagabantay sa anang barbecuehan sa kilid it provincial road sa Brgy. Lapnag, Banga.
Ginsaysay it anang lolo nga nakasaksi sa krimen nga sangka motorsiklo maghalin sa direksyon it banwa it Libacao ro nagpondo sa biktima sakay ro daywang ka eaeaki nga puro nakasuksok it itom nga eambong.
Owa sigon nanda raya naitsurahan bangud sa suksok nga tinted nga helmet.
Planado suno kana ro insidente bangud nga maskin ro andang gingamit nga motorsiklo hay ginpinturahan it itom ag owa it plate number.
Ginasugid nga ro insidente hay nag-ugat bangud sa land dispute ukon away sa eugta sa Brgy. Polocate sa nasambit nga banwa.
Owa sigon sanda it kilaeang kaaway it biktima ag owa man it posibleng dahilan agud nga patyon imaw, mag-eowas sa pagpursige sa kaso it anang ama.
Padayun pa ro ginapatigayon nga imbestigasyon sa insidente.
