KALIBO, Aklan–Mabahoe ro pagpasaeamat it pamilya it 15 anyos nga dalagita matapos nga pormal eon nga makapasaka it kasong rape kontra sa 19-anyos nga suspek sa prosecutors office it Culasi, Antique.
Suno kay alyas Dodong, tiyo it biktima nga nagaeaum sanda nga mataw-an it hustisya ro natabu sa annag gumankon.
Ro bilog sigon nanda nga pamilya hay matsa nabugbutan it tunok sa dughan bangud sa development.
Nasayuran nga sambilog sa naging ebidensiya sa pagpasaka it kaso hay ro medical result kun sa siin nagatuhaw nga positibong ginhimuslan ro biktima.
Bangud nga regular filing ro pagpasaka it kasong rape konta sa suspek hay temporaryo kara nga naangkon ro anang kahilwayan ag owa ginbutang sa presuhan.
Sa pihak kara, owa nalikawan ni alyas Dodong nga magpaguwa sa gihapon it kaeain it buot sa mga katapo it kapulisan it libertad bangud sa gina-alegar nga pagbalewala sa andang kaso.
Mag-eowas kara, ginapasugtan sigon it pulis nga hilway nga makapaeapit ro suspek ag ro anang ina nga ginasugid nga empleyado it MDWSO agud nga maka iistorya ro anang gumankon nga posibleng makaapekto sigon sa andang ginpasaka nga kaso.
