Kalibo Aklan ———-Eubos nga ginakasubo it pamilya it sangka 17 anyos nga eaeaki ro ginhimo karang pagpakamatay kahapon it agahon sa sueod it anang boarding house sa banwa it Banga.
Suno kay Nanay Cecil, ina it biktima nga ginakahilakan nanda ro anang unga bangud raya hay masaligan ag maboot nga klase it tawo.
Kamaturoan sigon kara hay imaw ro nagabantay sa unga it anang igkampod.
Ro biktima hay aktibo man sigon sa mga aktibidad sa andang eskuwelahan ag raya hay una eun sa Grade 12.
Imaw man sigon ro kamagueangan sa daywang magmaeanghod.
Suno pa kay Nanay Cecil owa sanda it ideya nga mahimo raya it biktima bangud nakaibahan pa nanda rayang magkaon antes nga natabo ro insidente.
Ro andang nasayuran eamang sigon hay may nabatun nga mensahe ro biktima maghalin sa anang girlfriend kung sa siin raya nakikipag-break eun.
Dugang pa it ina it biktma nga masyadong seryoso ro anang unga kung makikipagrelasyon ag posibleng anang ginbatyag ro ginhambae kana it anang nobya.
Samtang, kung may problema ka ag gusto mo it kaistorya, puwedi kang tumawag sa National Center for Mental Health Crisis Hotline (NCMH-USAP) sa 0917-899-USAP ukon sa 7-989-USAP .
Puwedi man nga magtawag sa Hopeline PH 24/7 hotlines: 0917-558-4673 (Globe), 0918-873-4673 (Smart) ukon 2919.
