KALIBO, Aklan—Plano it pamilya nga magpasaka it kaso matapos nga mabuno-patay ro 25 anyos nga eaeaki it anang kaparehong construction worker bandang alas-11:10 kabi-i sa may Hacienda Caridad sa Brgy. Tigayon, Kalibo.
Suno kay Irene arias, ina it biktimang si Junrel Arias, tumandok it Brgy. Rosal, Libacao ag presenteng naga-istar sa Brgy. Tinigaw, kalibo nga kabuhi it anang unga ro naduea.
Dapat suno kana nga magapanabat sa krimen nga nahimo ro suspek nga nakilaea kay Reckly Lobreque, 34-anyos ag residente it Brgy. Mercedes, Madalag.
Owa man sigon sanda it nasayuran nga nakaaway ro anang unga bangud nga mabuhay eon raya nga nagatrabaho sa nasambit nga lugar ag ginasaligan eon it andang amo.
Madumduman nga patay eon kat maka-abot sa Aklan Provincial Hospital ro biktima matapos nga mag-angkon it igo it pagbuno sa anang waea nga dughan , tuo nga parte it anang tiyan ag sa tuo nga abaga.
Sa imbestigasyon it kalibo municipal police station, samtang naga-inuman ro biktima sa sangka baraka kaibahan ro daywang iba pang katrabaho kat mag-abot ro suspek ag nag-order it batchoy.
Apang nakaangkon it mainitan nga diskusyon sa magtimbang nga parte kat nagkueutan-an kon taga siin sanda nga lugar.
Gulpi sigon nga nag-uli ro suspek sa andang barracks sa under construction nga building ag pagbalik hay may daea eon raya nga kutsilyo nga nagahaba it kapin sa 14 pulgada.
Sa owa it anuman nga rason hay ginbuno it makapilang beses ro biktima.
Sa pihak nga parte, ginpahayag ni arnel masagnay, tiyo it biktima ag barangay tanod sa lugar nga nagdaeaeagan ro daywang kainuman it anang gumankon matapos ro insidente bangud sa kahadlok.
Ginpamalibaran man nanda nga ginhana nga ginbunaean it bote it biktima ro suspek.
Insigidang nagpaeagiw ro suspek sakay it anang motorsiklo.
Ginsurender raya sa Malinao Municipal Police Station ni Norming Placido, ginasugid nga dating kabo kara sa sakada ag gin-agtunan idtu it Kalibo PNP ag gin-aresto.
Presenteng nakakulong ro suspek sa lock up cell it Kalibo PNP kamana man nga narekober ro kutsilyo nga gingamit sa krimen.
