KALIBO, Aklan — Naputos it kasubo ro pamilya it 54-anyos nga eaeaki matapos nga masapwan nga bangkay nga tadtad it igo it pagbuno sa sueod it staff house it ginabantayan nga hotel sa Brgy. Balabag sa isla it Boracay.
Suno kay Marlisa Flores-Idaño, igmanghud it biktimang si Dionelo Flores, 54-anyos, owa it asawa, residente it Brgy. Tayhawan, Lezo ag nagatrabaho bilang caretaker/manager it Sunflower Hotel sa isla nga mabahoe ro andang pagpati nga pagpanakaw ro motibo sa krimen bangud nga owa kara nakita ro anang daywang cellphone ag laptop .
Masubo sigon sanda bangud nga makabig nga bread winner ro biktima ag galante sa anang mga kaigbataan kon nagabakasyon sa andang lugar.
Haeos 30 anyos eon sigon raya nga nagatrabaho sa nasambit nga hotel, kun sa siin hay owa man it may ginasugid nga naka-away.
Nasayuran nga gina-imbestigahan makaron it mga otoridad ro nakita nga plastic bag nga may mga gamit it biktima nga puno it dugo sa white beach sa Sitio Bulabog .
Nagapati man sanda nga bukon eamang it sambilog ro may kahimuan sa krimen .
Madumduman nga nasapwan ro biktima it anang kaibahan nga “helper” nga nagakaya sa saeog, may tabon nga haboe ro anang itsura ag may daywang tama it buno sa leog, tatlo sa idaeum it anang ingkoy ag basag ro ilong.
Nagapadayun pa ro imbestigasyon it Malay Police Station sa insidente eabi eon sa pagtumod sa motibo ag kun sin-o ro may kahimuan sa krimen.
Gina-review eon man sigon it mga kapulisan ro CCTV footage sa lugar .
Ginpaidaeum sa post mortem examination it otoridad ro bangkay it biktima, apang owa pa it resulta.
