KALIBO, Aklan—Nagapati ro pamilya it 24 anyos nga gin-hold-up ag ginpatay nga empleyado it sangka cargo forwarding company sa anggulong inside job nga imaw ro ginatutukan makaron it mga awtoridad matapos nga maaresto ro sambilog sa gina-alegar nga mga suspek .
Suno kay Albert Regotia, ama it biktimang si Jan Andrei Bolido nga raya hay bangud nga ro naka-kustodiya makaron nga si Delsol Zonio, Jr., 35- anyos ag residente it Barangay Polo, Banga ag ro gina-alegar nga anang kakuncha sa krimen hay puro mga empleyado it J&T Express Philippines .
Ginpahayag dugang nga may ka-shifting ro anang unga sa pag-deposito it kwarta, apang natiempuhan nga imaw ro naka-duty kat matabu ro insidente.
Nagatuhaw nga kabisado it mga suspek ro daily routine it kompaniya partikular ro pag-deposito it mabahoe nga kantidad it kwarta halin sa andang opisina paagto sa sangka money remittance center .
Sa pihak kara, ginatugyan nanda sa kapulisan ro imbestigasyon kun sa siin nakikita eon sigon nanda nga mataw-an it hustisya ro kamatayon it andang unga sa mas madali nga paniempo ukon antes raya nga igahatud sa anang ulihing paeahuwayan .
Ro bangkay ni Bolido hay nakahamyang sa baeay it anang ina sa Barangay Tondog, Tamalagon nga owa pa it schedule ro eubong bangud nga may ginahueat pa nga miyembro it andang pamilya.
Hasta sa makaron sigon hay medyu una pa sa state of shock ro anang ina bangud nga indi kara mabaton-baton ro pagkamatay it anang unga sa batang edad ag nagabulig sa gastos sa pagpa-eskwela sa anang manghud.
Ro biktima hay ginbaril nga tinamaan sa anang tiyan sa guwa it andang opisina sa Sitio Tabok, Barangay Dumga, Makato ko nagtaliwan nga Abril 27 matapos nga agawon ro anang daea nga inugdeposito nga kwarta.
