KALIBO, Aklan— Blangko pa ro pamilya sa motibo sa krimen ag ro mga tawo nga posibleng eakot sa kamatayon it mag-ama nga nasapwan sa Mahogany Plantation sa Barangay Camanci Sur, Numancia.
Owa eon it kabuhi nga nasapwan ro mag-amang Narciso Andelecio, 59 anyos ag Jay-ar Andelecio, 29 anyos, mga residente it Brgy. Bubog Numancia nga parehong may igo it bala sa nagkaeain-eain nga parte it eawas bandang alas-8:20 kabi-i it Miyerkules.
Suno kay Mrs. Gemma Andelecio-Ginoy, panganay nga unga ni Narciso, pasado alas-7:00 it agahon hay nagpanaw ro mga biktima agud nga magbus-ak it kahoy sa nasambit nga lugar.
Nakasanayan eon sigon it mag ama nga nagapangahoy kon agahon ag naga-uli bandang alas-10 hasta alas-12 it udtro adlaw agud nga mag-ilabas.
Apang nangawa sanda bangud nga gabi-i eon hay owa pa sanda naka-uli.
Bangud kara, nagdesisyon ro live-in partner ni Jay-ar kaibahan ro sambilog pa nga agtunan ro lugar ag dikara nasapwan ro magkaiping nga eawas it mag-ama nga nakahapa ag parehong duguan.
Nakita pa sigon sa lugar ro motorsiklo nga naka-park sa guwa it gate it naka-kurae nga private property nga ginapangahuyan it mag-ama.
Ginapasugtan sigon ro mga biktima nga magbo-oe it kahoy sa lugar nga kaeabanan nga ginabaligya nanda sa mga lechonan.
Ginasugid nga nagsaylo sa Brgy. Bubog ro pamilya Andelecio agud nga makalikaw sa gulo sa dati nanda nga gina-istaran sa Sitio Taroytoy, Brgy. Manica, Libacao, kun sa siin eakot ro andang pamilya sa ubusan ng lahi ko 2013 ukon haeos napueong dag-on eon ro nagtaliwan.
Gindugang pa ni Ginoy nga bukon sanda it sigurado kon konektado ro pagpatay sa mag-ama sa dating bagina nanda sa Libacao apang nagapabilin nga paealigban kon sin-o ro responsabli sa krimen.
Ginpamalibaran man nana nga may nakaaway ro mag-ama sa andang gina istaran.
Kadungan kara, nag apela ro pamilya sa mga suspek nga magsurender ag makonsensiya sa andang gin obra nga pagpatay.
