Kalibo Aklan ———-Nagapanawagan it hustisya ro mga pamilya it mag-ina sa Upper Hinulugan, San Jose sa Carabao island ukon Hambil, Romblon nga namatay sa masaker bandang alas-12:35, Miyerkules it aga-aga.Madumduman nga ro mga biktima nga nakilaea kanday Welyn Mendoza Tabuna, 29 anyos, single parent; ag daywang unga nga eaeaki nga sanday TJ Tabuna, alyas boy, 9 anyos ag JB Tabuna, alyas jun , pitong dag-on, puro mga residente it nasambit nga lugar hay nag angkon it mga grabeng tama it pagbuno ag eabo sa nagkaeain-eain nga parte it eawas.
Suno kay Caticlan Barangay Kagawad Chito Tolosa nga masyadong brutal ro pagpatay sa anang igkampod matapos nga mag angkon it 17 nga nina ag ro mga unga hay may tig-ap-at nga tama.
Ginasugid nga matapos nga magtambong sa sangka birthday party hay pilit nga nag-uli ro mag-ina pasado alas-11 it gabi-i ko martes ag pagka-aga hay nasapwan ro mga raya nga owa eon it kabuhi.
Ginpahayag dugang nga haeos pitong dag-on eon nga bueag si Welyn sa anang asawa nga tumandok it Tablas, Romblon .Ko Disyembre 23 sigon hay ginsueang ni Welyn ro anang panganay nga unga sa Tablas .
Samtang, mabahoe ro andang pagpati nga bukon it pagpanakaw ro motibo sa krimen bangud nga intact pa sa eawas it biktima ro anang mga suksok nga alahas.
May mga persons of interest eon sigon ro kapulisan apang nagapadayun pa ro imbestigasyon.Nagpamalibad anay imaw nga hingaeanan ro daywang mga suspek.
